قبل اي شيء لو سمحت(ي) تقرأ الفاتحة عن روح والدي وتدعو له ولأمواتنا وأمواتكم بالرحمة والمغفرة.
من اسبوع وفي هاض الوقت وصلني خبر وفاة والدي عن طريق رسالة من أخوي الصغير, خلال هاض الأسبوع تغيرت عندي او تأكدت كثير من المفاهيم بسرعة, وهاي لمحة بسيطة عن ما يجول داخل دماغي وفضفضة.
من اسبوع وفي هاض الوقت وصلني خبر وفاة والدي عن طريق رسالة من أخوي الصغير, خلال هاض الأسبوع تغيرت عندي او تأكدت كثير من المفاهيم بسرعة, وهاي لمحة بسيطة عن ما يجول داخل دماغي وفضفضة.
الجسر
الجسر ما بين فلسطين والأردن هو عبارة عن مصنع للذل والهوان, بتفننوا كيف يخلوا الناس يكرهوا بعض ويكرهوا البلد, بنسوا الناس الإحتلال وخطوط سايكس بيكو وبتذكروا إنو العرب ما بعرفوا النظام وبلتهوا بالمسبات على بعض وبضيع الوطن كل يوم الاف المرات بين دموع الأطفال والحر والذباب.
عمان
عمان اللي تربيت امشي في شوارعها وانا صغير كل صيف لما اترك جنين واروح اقضي الأجازة فيها تغيرت, صارت بشعة جداً مثل فتاة ليل أخذوا اللي بدهم إياه منها وتركوها على الرصيف مجرحة, مكياجها سايح على خدودها مع دموعها واللي مارقين لسا بعاكسوا فيها وبزتوا عليها اعقاب السجائر, ما حدا وقف لعمان ولا حدا إهتم في عمان الكل بدو يستثمر في عمان ويصير غني من تحت راس عمان والأسعار في السما والناس مش طايقة بعض والبلد مش واسعة لا القريب ولا الغريب.
الصحاب
في منهم اللي بشرفوني وبحبهم قد الكون, اللي وقفوا معاي وما قصروا ولحد ما اموت ما رح انسا وقفتها معاي, في منهم ما كنت اعرف قديش هما جدعان وولاد اصل, وفي منهم اللي سقطوا من عيني مثل الرمل من الغربال, الصاحب الصح هو اللي حتى لو مش واقف جنبك بجسدو بحسسك إنو معاك, أما قليل الأصل ما تعاتبو, شيلو من حساباتك على شان ما بستحق الوقت اللي بدك تضيعو عليه.
القرايب
مثل الصحاب ولكن الفرق إنو القرايب بتقدرش تعملهم بلوك على الفيس بوك وتخلص.
أنا
ندمان على كل الوقت اللي ضيعتو في حياتي اللي كان ممكن هس كل اوضاعي تكون مختلفة ١٨٠ درجة, ولكن هيني مركز جداً على اللي بدي إياه واللي رح يحصل قريباً إن شاء الله هي مسألة وقت لا أكثر.
ابوي
الإنسان اللي قدر يحول مشاعري لإلو من مشاعر سلبية لمشاعر حب وإحترام وصداقة, إنسان صاحب علم ودين ومحبة للفقير قبل الغني, عشت مع ابوي سنوات قصيرة ولكن جميلة وكان نفسي أعيش معاه اطول ولكن ظروفنا كانت صعبة جداً وما بعلم فيها غير الله, ولقائنا في الجنة إن شاء المولى عز وجل.
الخلاصة
الألم زائر ثقيل مش راضي يفارقني, ابداً مش حابب اقعد لحالي وخايف من إني أقعد لحالي لإنو الأفكار عم بتعض في راسي يمين وشمال, كل ما اقول صرت منيح وخلص تأقلمت مع الوضع عم بشعر في فراغ كبير, بالزبط مثل واحد غرقان في بحر معتم في ليلة ما فيها ضو قمر.
الألم زائر ثقيل مش راضي يفارقني, ابداً مش حابب اقعد لحالي وخايف من إني أقعد لحالي لإنو الأفكار عم بتعض في راسي يمين وشمال, كل ما اقول صرت منيح وخلص تأقلمت مع الوضع عم بشعر في فراغ كبير, بالزبط مثل واحد غرقان في بحر معتم في ليلة ما فيها ضو قمر.
مش سهل يموت ابوك, مش سهل يموت حدا كان نفسك إنك تفرحوا وتعوضوا عن كل الأيام المرة, مش سهل تتأكد إنو الفرصة راحت على شان تشوف إبتسامتوا وفخروا فيك, انا وابوي كانت علاقتنا علاقة صداقة اكثر من علاقة اب وإبن, ابوي عند ربنا اللي انا ما عندي شك بوجودو واللي متأكد رح يجمعني معاه في مكان افضل, ولو الأيام ترجع كان كثير شغلات عملتها بطريقة افضل.
ولكن حالياً أبداً مش وقت لكلمة "لو" او "كان" حالياً هو الوقت الوحيد والفرصة الأخيرة اللي رح اعطيها لنفسي على شان اسعد اللي حولي واساعدهم, لإنو انا متأكد ١٠٠٪ وما عندي ذرة شك إنو هس سعادتي هي فقط بسعادة أقرب الناس لإلي.
رحمة الله عليك يابا يا حبيبي.
رامي.
