"إنتا إلك أب, أنا ما إلي أب, مات وأنا عمري سنتين ..." رديت عليه قلتلو اه بس أنا أبوي مسافر من زمان ... كان نفسي أراضيه أفهمو إنو لما الواحد يكبر بتعود على الوجع وبصفي الوجع عكاز يتعكز عليه في عالم كلو وجع ... بس للأسف هو بسيط و "على البركة" .. وأنا بسيط مثلو ولكن كنت محظوظ أكثر بإنو إنخلقت بدماغ سلاكو مركبة بشكل أفضل منو ..للمسكين ...كمل وقال "اليوم بنت بتحكي لأبوها أعطيني ٢٠٠ شيكل ... أنا خف عقلي ... تضايقت كثير" سألتو أو حدا من الشباب سألو ليش, كان جوابو قمة البرائة "بغار! ... أنا بغار! ليش هي إلها أبو يعطيها وأنا ما إلي؟" .. قلتلو ربك اللي بعطي اللي هو أحسن من الكل أطلب من ربك ...
عمرو ٢٢ سنة ... مكمل للصف التاسع بس ما بعرف يقرأ ولا يكتب, بشتغل شغلة متواضعة جداً, النظافة الشخصية مسألة بحاجة للمعالجة عندو, ولكن غير هيك كانت جميل ومؤلم الحوار معاه, كان جميل لإنو شخصية تركيبها غريب جداً, في عندو أدب وإحترام شديد للأخرين وبنفس الوقت تطفل و "وقاحة" هي بالأصل عبارة عن عدم إلمام في الزيف المجتمعي المسمى "لباقة" ... مش عارف بالزبط كيف هو قادر يجمع هيك خصال مع بعض, يعني بطلب منك بأدب "ممكن أقعد؟" .. "ممكن سيجارة لو سمحت؟" ... وحتى الطلب البريء لما مسك بكيت دخان عبود وحكالو "ممكن أخربش؟" ...
مش عارف .. ما في هدف حقيقي من اللي بكتبوا ما في خطاب أخلاقي وموعظة ووعود بمستقبل أفضل ... هي تجربة من هالتجارب اللي بمر فيها حبيت أشاركها .. شعوري مش كثير مهم لإنو ما بغير من واقع هاذ الشخص إشي .. ولكن ما بشعر في الألم بالقدر "الهوليودوي" أو حتى "المصري-وودي" -؟؟؟- ... الشفقة والتعاطف كمان مرة مش كثير مهمات بما إنو ما بقدر أغير إشي ...
ولكن في أكم سؤال في راسي ... هل الألم حقيقي؟ قصدي يعني مش ممكن نكون بنتخيل الألم كألية دفاع؟ مثل ما بنشعر بالألم لما نمسك النار كنوع من أنواع الإنذار على شان المنطقة من الجسم اللي قريبة على النار ما تخرب؟ وعدم الشعور في الألم بكون كثير سيء لإنو معناتو هاي المنطقة خربت خلص؟ معناتو لو روحنا\قلبنا\عقلنا ما بشعروا بالألم ... في إشي غلط وقتها!
وفي سؤال ثاني أعمق شوي ... هل الصواب والخطأ .. العدل والظلم ... بعيداً عن جواب النصوص الدينية, هل هاي المزدوجات حقيقية؟ إلها كيانها الخاص؟ هل الظلم شيء حقيقي أم هو فهم لموقف؟ ونفس الشيء العدل هل هو فهم لتصرف او هو كائن حقيقي؟ وممكن ما بتفرق .. لإنو الأفكار هي كائنات ...
كثير فلسفة لليلة وحدة ... مش رح أشارك هاي التدوينة على الفيس بوك .. مش حابب "أبعص كيف الكوكب" أكثر من هيك ...
نحن ملوك البطاطا .. ملوك الماضي السحيق, الماضي الأعور, الماضي اللي لحد اليوم لسا بنعيش في, الماضي اللي الله يفضح عرضو من ماضي شو إنو ما حدا فاهم منو إشي ولما تتناقش معاه بحسسك إنو كان يسهر مع هارون الرشيد في رام الله التحتا ...
نحن ملوك البطاطا .. ملوك المقاطعة والممانعة والمسايسة والمسايرة والتنسيق والتطبيع والتجويع والتسويف والخوف والشجاعة والإيمان والكفر والأخلاق والفجور والشاي والقهوة والشدة والزهرة والشطرنج والطابة وسبع حجار ...
نحن ملوك البطاطا .. ملوك كل شيء واللا شيء والشعر والفلسفة والنثر والتعرصة والهلس والهلسنة والعلم والفكر والبحر والسحر والفلك والجغرافيا والتاريخ والفيزياء والكيمياء والرياضيات واللغات والأبعاد والمبعدين والمبعدات ....
نحن يا صديقي ملوك البطاطا ... ملوك الإنتقاد والتنظير وإتقان لعبة "الأخر عرص" و شقيقتها "شوف حالك في الأول" والأفضل بلا منازع "الحق مش علي" والأخيرة تقال داخل دهاليز العقل الباطني من رجالات بلاط الدماغ الحاكم ...
يا صديقي ... ما تفقد شقفة هالأمل ... خليها .. خللها ...
وإذا بيوم حسيت إنك مش فاهم إشي, ولا ليش هيك بصير معانا, تذكر إنو إحنا ملوك البطاطا ....
نزلت ٣ كيلو في الأسبوع الماضي من خلال مراقبة السعرات الحرارية اللي باكلها في اليوم ونوعية الغذاء, بدون أي تمرين وفي حركة قليلة جداً عن طريق إستخدام برنامج MyFitnessPal, ناوي قريباً إن شاء الله أضيف للنظام الغذائي التمارين الهوائية "الأيروبيكس" والمشي ولكن بالأول بدي أضعف كمان شوي على شان أصير أقدر أتحرك أفضل, اللي ممكن يزبط معاي ممكن ما يزبط مع غيري, وزني الزائد جداً عن الحد بسمحلي إني أكون مرن أكثر في الحمية الغدائية ولكن اللي حابب ينزل أكثر ووزنوا أصلاً ما بتعدا ال ١٠٠ كيلو وقتها لازم يكون النظام الغذائي أقسى شوي, وما وصلت هاي المرحلة ما بقدر أكتب عنها, ولكن هاي النصائح بشكل عام هي اللي لقيتها في عشرات المقالات والمواقع.
٣ نصائح بعتقد إنهم هما الأفضل :
١. لازم يكون عندك هدف محدد, يعني لازم تعرف كم كيلو لازم تنزل والفترة ويفضل إنو ما يتعدى الموضوع كيلو في الأسبوع, يعني بدك تنزل ٤ كيلو في الشهر! وهاذ شيء جميل يعني خلال سنة بتقدر تكون نازل أكثر من ٤٨ كيلو لو ضليتك ماشي على النظام الغذائي!! ومعظمنا مش بحاجة إنهم ينزلوا ٤٨ كيلو ... ما تحاول تلاقي الحل السريع, النزول السريع في الوزن بالإضافى إلى إنو غير صحي في معظم الأحيان ولكن أيضاً على الأغلب رح يرجع الوزن اللي خسرتو ويكون في ترهلات في الجلد من بعد الخسارة المفرطة.
٢. ما تدبح حالك, الهدف إنك تكون بصحة جيدة ومزاج جيد, مش إنك تحرم حالك من الطعام, أوصل لقناعة إنو الأكل وجد على شان نعيش, مش غلط تستمع في الاكل, ولكن بإعتدال, الأكل اللي بتحضر في مطاعم الأكل السريع هو على الأغلب غير صحي وتجاري.
٣. أفهم طريقة عمل جسمك, وكيف الإنسان بضعف وكيف بنصح على شان تفهم شو لازم تعمل, الإنترنت مليء في المقالات والموارد هاي أكم رابط وجدتهم اثناء كتابة المدونة إن شاء الله يفيدوكم :
القهوة والشاي : بحاول الإبتعاد عن السكر فيهم ولكن بم انو براقب شو باكل في اليوم هاي الميزة بتساعدني إني اعرف الكمية الكافية
أطعمة كنت أكلها بإعتدال ومش بشكل يومي
اللحمة المشوية أو المطبوخة
المأكولات البحرية
صدر الدجاج بدون الجلد
البيض
أطعمة كنت أكلها بشكل قليل جداً
الرز
البرغل
اللحمة والدجاج
السكر : مع العلم إنو يجب الإبتعاد عن السكر ولكن برضو بما إني بشرب شاي بحب الشاي مع السكر!
الخبز الأسمر (البني)
أطعمة ما كنت أكلها نهائياً خلال الأسبوع
البطاطا المقلية والشيبس
الطعام المقلي بشكل عام, ما عدا البيض والعجة وبشكل معقول جداً.
الخبز الأبيض.
المشروبات الغازية.
الشيبس
أي إشي من مطاعم الأكل السريع ما عدا السلطات
وأخيراً هاي كمان ٧ نصائح بتساعدك أكثر إنك تكمل الطريق
الخبز الأبيض مضر كيف ما فكرت فيها, الأبحاث موجودة في كل مكان عن المساويء اللي هي أكثر من الفوائد في الخبز الأبيض, على شان هيك تجنب الخبز الأبيض والمنتجات العالية في الجلوتين.
الأكل اللي في كثير كاربوهايدرات بشكل عام تجنبو, لإنك لما تفهم كيف بشتغل الجسم بتصير تعرف إنو الأولوية في الحرق بتروح للكاربوهايدرات بالتالي لما نظامك الغذائي يحتوي على أطعمة فيها الكثير من الكاربوهايدرات رح جسمك يستعملها كوقود ويهمل الدهن المخزن في الجسم.
قسم وجبتك لعدة وجبات صغيرة أو خذ وقتك في الطعام وما تنسا تمضغ الطعام منيح, الأكل السريع مضر وغير مشبع!.
سجل كل إشي بتاكلو, ودور على المعلومات الغذائية اللي موجودة فيه, في برامج بتساعد جداً وبتعمل الخطوتين مع بعض مثل MyFitnessPal اللي أنا بستعملو, ولكن الإنترنت مليء في الموارد المساعدة, البرانامج هاذ بوفرلك معلومات مهمة مثل كم سعرة حرارية لازمك في اليوم من خلال طولك ووزنك وطبيعة نشاطك.
عود جسمك يحب الأكل الصحي, مش ضروري الأكل الصحي يكون ممل, يعني بتقدر تضيف صدر جاج بكمية معقولة على السلطة.
لو في يوم غلطت وأكلت إشي غلط ما تستسلم وتكسر كل النظام الغذائي, عوض في اليوم الثاني
حط عينك على الفوائد اللي رح تصير عندك بعد ما تخسر الوزن, من راحة أكثر, ملابس أجمل, حركة أفضل, والأهم الصحة الأفضل ...
تحذير أكبر من عدد سكان قطر : هذا نص تهكمي ساخر ولا يتعدى كونه ذلك.
"معنى كلمة نساء هى نسىء اى التاخر او التخلف عن شىء ما و وسميت النساء نساءا لتخلفهم عن الحروب نساء هي كلمة جمع في ذاتها وتعني في المفرد امرأة وقد أخطأ من قال مفردها نسئ لأن لم يرد عن العرب ذكر النساء إلى بهذا الجمع وهي جمع بذاتها وكثير من المفردات العربية لم تأتي إلا جمع النِّسَاءُ - نِسَاءُ"
شوف يا حفيظ العمر والسلامة, النسوان إتفق شعراء العصر وفلاسفته وبوعز وفؤاد وسمير التتح إنهم فش مخ, أو بالأحرى وبلغة العصر, فش لقط, يعني بتكون ماشية على البركة الحياة معاها, سارحة والرب راعيها وفاضح عرض اللي بيجي فيها, على شان هيك فعلياً لو قعدت تحلل وتشبر وحتى تبلط مش رح تقدر تفهم النسوان بشو بفكرن, مستحيل, بالزبط مثل المستحيل تبع إنو يكون في حاكم عربي نظيف!.
هس لاحظ هون إنو أنا مش عم بغلط على النسوان, أبداً أبسلوتلي! الكليشيه تبع "إمك وأختك وبنت عم أبوك ونصف المجتمع" و الحديث اللي أصلاً مش موجود ولا في صحيح تبع "الجنة تحت أقدام الأمهات" وكل هاي القصص على عيني وراسي وكفائة وجميل وأعجبني ... ولكن ... وهون في تشويق وسسبنس وإثارة ... ولكن يا كبير صدقاً النسوان سبب تعريص أخت هاذ الكوكب, ورح أثبت هاذ الشي في 5 نقاط وبعدها بتكتشف قديش إحنا مظلومين :
5. لو فش نسوان كان فش داعي نتحمم, العادي لو ريحتنا تطلع, شو يعني؟ بننزل في الشهر مرة في النهر ولو فش نهر في البحر ولو فش نهر ولا بحر بتكون الحياة زهق وأكيد إنتا وقتها فش داعي تتحمم على شان تموت ونخلص!.
4. لو فش نسوان كان فش داعي نشتغل, ليش نحوش؟ ليش أصلاً نفكر في بيت ومش بيت وقصص ليش ما ننام في العراء وخلص, لا في عيلة ولا في ما يحزنون, إن شاء الله نمت على محرمة, إنتا براسك بتعرف خلاصك.
3. لو فش نسوان فش مشاكل, كان 99% من المسلسلات المصرية والأفلام المصرية -والعربية يا سيدي ولا تزعل- ما إنعملت من أصلو, وكان فش ولا حدا تقاتل مع حدا على شان بتطلع على حبيبتي او بحاول يزبطها او مزبطها وبضربوا أيس كريم مع بعض في السر, كان الكل بحب الكل أو أصلاً فش داعي للحب من أصلو ... هاي لازم أحطها في نقطة لحالها بس مش فاضي.
2 - لو فش نسوان كان فش تعريص إم خولات زناخة الإستعراضات المزيفة وكس إم الدلع والصور التافهة والشعر المفطس والزفت هاض كلو! كان نزار قباني مات و 3 بعرفوه بس منهم الدكتور اللي كشف عليه, كان قيس صار زلمة, كان عنترة لحد اليوم عايش.
1. لو فش نسوان كان فش حياة, يعني فش خلفة وخلص من أول لفة طلعنا بالعارضة, وهاض شيء جميل! لإنو أنا رافض قطعياً أكون عايش على كوكب تافه ووضيع مثل هاذ الكوكب محاط بكائنات أقل ما توصف به إنها همها الأعظم أن تنيك, أو تنتاك, وتسعى دائماً لهاذ الشيء حتى على فراش الموت.
شفت كيف؟ شفت كيف إنو ولا إشي جايبنا كتاف غير النسوان! يعني ... حسبي الله ونعم الوكيل بس .. حسبي الله ونعم الوكيل ...
وأخيراً, أعيد وأكرر إنو هاي المدونة هي مفكرة أنا بكتب فيها الخرى اللي بدي إياه, مش عاجبك طنيب على ولايا الست الحجة تبعتك إنك تعملي بلوك وما تقرأ شو بكتب, لإنو المشكلة أنا مش طالب رأيك, ولا طالب منك أي إشي في الدنيا, والنقد البناء هاض في الأوسكار بدفعولك عليه قروش لأبو موزة فعف عن طيزي وما تحكيليش حلو أو مش حلو.
وبعد أخيراً, ممكن تفكر أخي القاريء إني محشش, او سكران, وهون بتوقع في الفخ لإنو شكلك حمار وبحياتك ما حششت أو سكرت لإنو المحشش أو السكران كبيروا يكتب بوست لو تخلعوا في الحيط بنزلش منوا حرفين مفهومين, وبعدين كمية القرف الموجودة في هاذ البوست صعب تتعايش في نفس الدماغ مع أي نوع من أنواع المعليات المحرمة دولياً وفي حدود مناطق السلطة الوطنية الفلسطينية رضي الله عنها وأرضاها.
وبعد بعد أخيراً, لو في أي وحدة نسوان مزة زعلت من هاض الحكي بحب أحكيلها ما تزعلي بيبي, كلنا إلنا أراء وبنحب نحكيها وإذا ما حكيناها بنكبر وبنختير وبصير معانا كثير مصاري وبنصير رئيسين لدولة وبننيك إم الشعب من الكبت اللي فينا ... وإذا كانت مش حلوة ومش عاجبها الحكي بحب أحكيلها ... مش رح أرد عليكي, قلبي معاكي, الله يحليكي ويخليكي, او يوخذك ويريحنا منك ينعل أبو منظرك مثل قرد راكب حمامة.
وبعد بعد بعد أخيراً, مع إنها قصيدة بحبها جداً وشاعر بحبوا جداً وما إلها دخل بشكل مباشر في اللي بحكيه, بس عنوان التدوينة ذكرني فيها ... خذ نظف ذنيك في "هالوسخ" الجميل.
ما بعد النص : لا أصنف ما كتبته على إنه شعر, هو مجرد ترجمة للمشاعر,لعب طفولي عبثي في الكلام, وأنا لا أمتهن الكلام, يا ريت, يا ريت الكلام هو اللي بطعميني لقمة السم اللي في لقمة عيشي, كان أنا مبسوط, كان ما بترك الموضوع تحت رحمة الموهبة, ولكن لا, هواية هاي, والهوا بلعب فيها دور البطولة.
1. أنا بحب التدوين, بالأصح بحب الكتابة وبالتحديد بالعامية; بتخيل حالي بحكي الشغلة وبكتبها زي ما بسمع حالي بحكيها في خيالي ... ميكس أني سينس؟
2. كثير ناس رح تفهمك غلط شو ما عملت, لإنو الناس بقيسوا الأمور على حالهم وكيف هما بفكروا وشو هما, مستحيل حدا ما بعرف اللون السنشلولحي يعرف يوصفو أو يفهمو لما تحكي عنو ... لذلك رح أعمل وأقول اللي بدي إياه والناس يفهموا مثل ما بدهم يفهموا ...
3. حتى لو إشتريت تذكرتين باص على الجسر ... خاوة في واحد رح يقعد جنبك يا على شان رح تشفق عليه إنو واقف او على شان هو رح يحرجك ... أنا شفقت عليه .. وهو أحرجني.
4. تحديث : شطبت هاي النقطة على شان صديق طلب مني أعمل هيك مع إنو مش من عادتي أعمل هيك بس حاضر ولا تهون.
5. في أغنيتين كثير بحبهم, الأغنية الأولى توصف الوضع سابقاً, والأغنية الثانية توصف الوضع حالياً ... والسلام عليكم ورحمة الله
أنا ... حالياً تمام وضعي, وجع في المفاصل بعد سفرة طويلة, أول مرة بسافر على أميركا -وأنا واعي, مش طفل- وطبعاً الصدمة الكبيرة مش لما تروح عندهم, وإنما لما ترجع عنا, من نظرات الإستقبال في المطار للمراثونات الدولية اللي بتصير من حوليك على شان "لقمة العيش" اللي بحاول سواق باص او تاكسي "يوكلها" منك.
أنا ... قررت أضعف, قرار حقيقي لا رجعة فيه, القرار مش نابع من إنو بدي شكلي يكون "سكسي" وإنما نابع من إنو أنا عم بموت, وعم بتحول بإرادتي لإنسان معاق حركياً غير قادر على الحركة الطبيعية, ناهيك عن أوجاع المفاصل والصدر والظهر و ... والحمدلله رب العالمين.
أنا ... مشتاق لإمي, مشتاق للقهوة الصبح هاي القهوة السحرية اللي كنت أفكر إنها مجرد قهوة مطحونة ومي سخنة في فنجان إكتشفت إنها عبارة عن إختزال لكل صباح, هدية من ربنا, الواحد ما بعرف وينتا بتغرب أو بفترق عن اهلو, لذلك كل لحظة معاهم حتى لو فيها مشاكل, هي هدية.
أنا ... تأكدت إني بطلت أحب عمان ... أسف.
هي ...
هي ... مشتقلها قد الدنيا, ينعل تاريخها شو مشتاق أشوفها وأحكي معها وأحكيلها اللي صرلي, أحكيلها قديش بحبها قديش بموت فيها قديش كنت غلطان وقديش كنت على صواب بنفس الوقت لما أطلقت رصاصة رحمة على اللي بينا, بإيدي قتلت قلبي.
هي ... مفكرة إنو أنا مبسوط بالبعد عنها وهاد اللي بدي إياه, ما بتعرف قديش رسالة مسحتها قبل ما أوديها, قديش مرة أجي أتصل فيها وأوقف حالي, ما بتعرف كثير شغلات حقها تعرفها.
هي ... ما بحياتها رح ترجع, مش لإنو هي ما بدها, ولا لإنو أنا ما بدي, ولكن لإنو ما في مطرح للرجعة, ما في مكان في الوقت ولا الفقر ولا الأحوال ولا كل إشي زبالة في حياتي ,وأكدتلي هاذ الإشي لما إلتقينا في الشارع "أغراب واحد ما يعرف الثاني" ...
هي ... ما رح أنساها ورح تضل حبيتي.
الشغل ...
الشغل ... خرى.
الشغل ... ما رح أشارك حدا من يوم وطالع, وما رح أشتغل عند حدا من يوم وطالع, وما رح أخد من أي حدا أي إستثمار طول ما هاذ الإستثمار اللي بديروه فايتين على طوشة مش فايتين على نجاح.
الشغل ... رح أصير مليونير قريباً, ما رح أخد إستثمار من فلان ولا فلان, رح أصير مليونير لإنو رح أعمل سلسلة من التطبيقات والمواقع اللي بتفيد البشر, وقتها, رح أصرف الملايين على الشيبس والميلك شيك.
الشغل ... حكيت خرى؟
ملاحظة : كتبت هذه التدوينة الساعة السادسة والنصف صباحاً بتوقيت عمان ونشرت الساعة ال ٧ وكسور ... مبارح في الليل وصلت من سفر ٢١ ساعة, ما تأخذونا يا جماعة الخير.
